ឥណ្ឌូណេស៊ី៖ ប៉ូលិសឥណ្ឌូណេស៊ីបានឱ្យដឹងនៅថ្ងៃអាទិត្យ ទី១២ ខែឧសភានេះថា មានមនុស្សយ៉ាងហោចណាស់ ១១នាក់បានស្លាប់ និងរាប់សិបនាក់ផ្សេងទៀតបានរងរបួស ក្នុងហេតុការណ៍គ្រោះថ្នាក់ចរាចរណ៍រថយន្តក្រុងដឹកសិស្សវិទ្យាល័យមួយគ្រឿង ដែលហេតុការណ៍នេះកើតឡើងនៅក្នុងកោះជ្វា Java កាលពីល្ងាចថ្ងៃសៅរ៍ម្សិលមិញ។

បើតាមប្រភពពីសមត្ថកិច្ចបានឱ្យដឹងថា រថយន្តក្រុងខាងលើមានដឹកអ្នកសិស្សានុសិស្ស និងគ្រូបង្រៀនសរុបប្រមាណ ៦០នាក់ ដែលធ្វើដំណើរចេញពីទីក្រុង Depok ឆ្ពោះទៅកាន់ទីក្រុង Lembang ដែលជាគោលដៅទេសចរណ៍ដ៏ល្បីល្បាញមួយ ពោលគឺជាកម្មវិធីអបអរសាទរការបញ្ចប់ការសិក្សារបស់សិស្សានុសិស្សថ្នាក់វិទ្យាល័យ។ 

ប៉ូលិសបានបញ្ជាក់ថា បើតាមសាក្សីនៅក្នុងហេតុការណ៍នេះបានឱ្យដឹងថា ដំបូងឡើយរថយន្តនេះបានធ្វើដំណើរជាធម្មតាទេ មុននឹងមកដល់ចំណុចកើតហេតុក៏មានបញ្ហាបច្ចេកទេសគ្រប់គ្រងលែងបាន និងរេចង្កូតទៅឆ្វេង និងបុករះជាមួយឡានមួយគ្រឿង និងបានបន្តទៅបុកជាមួយម៉ូតូបីគ្រឿងផ្សេងទៀត។ សមត្ថកិច្ចក្នុងតំបន់បានបញ្ជាក់ថា៖ "ក្នុងចំណោមអ្នកស្លាប់ទាំង ១១នាក់នោះមានសិស្សសាលាចំនួន ៩នាក់ គ្រូបង្រៀនម្នាក់ ព្រមជាមួយអ្នកធ្វើដំណើរដោយម៉ូតូម្នាក់ទៀត"។ ដោយឡែក បើតាមរបាយការណ៍របស់ប៉ូលិស ហេតុការណ៍គ្រោះថ្នាក់ចរាចរណ៍បណ្ដាលឱ្យមានអ្នករងរបួសធ្ងន់ចំនួន ១៣នាក់ និងរបួសស្រាលប្រហែល ៤០នាក់ទៀត។ 

មេប៉ូលីសចរាចរណ៍ក្នុងតំបន់ Undang Syarif Hidayat បានប្រាប់សារព័ត៌មានក្នុងស្រុកថា ហេតុការណ៍ខាងលើត្រូវបានគេសង្ស័យថាទំនងមកពីបញ្ហាហ្វ្រាំងរបស់រថយន្តក្រុងបានដំណើរការខុសប្រក្រតីមុនពេលជួបគ្រោះថ្នាក់ ប៉ុន្តែយ៉ាងណាមិញសមត្ថកិច្ចក៏បានបើកការស៊ើបអង្កេតស្វែងរកមូលហេតុពិតប្រាកដនៃគ្រោះថ្នាក់ចរាចរណ៍នេះផងដែរ៕